பரிசல்

நவம்பர் 8-ம் தேதி வந்த சந்திர கிரகணத்தை பதிவு செய்தேன். சுமார் ரகத்தில் வந்திருக்கு. கடும் குளிர். தெளிவாக காமிராவைக் குவிக்க (Focus-இதற்கு என்ன தமிழில்?!) முடியலை.

'அமெரிக்கா', 'அமெரிக்க வாழ்வு', 'அமெரிக்க கனவு' என்றதும் உங்கள் மனதில் தோன்றுவது என்ன? சுதந்திரமான வாழ்க்கை, விரைவுச்சாலைகள், பல்லங்காடிகள்(malls), மக்டானால்ட்ஸ், பர்கர் கிங், நாஸ்டாக்(nasdaq), பங்குச்சந்தை, வால் ஸ்ட்ரீட், வெள்ளை மாளிகை, என்ரான் போன்ற ஐக்கிய மாகாண சின்னங்களா? அப்படியென்றால் மிச்சமுள்ள 550 மில்லியன் மனித ஜீவிகளையும், 7,785,000 சதுர மைல் நிலப்பரப்பையும், அதன் இருப்பையும் இழிவு செய்கிறீர்கள் என்று அர்த்தம்!

Dictionary.Com-ல் இட்டுப் பார்த்தபோது வந்தவை.

adj
1. Of or relating to the United States of America or its people, language, or culture.
2. Of or relating to North or South America, the West Indies, or the Western Hemisphere.
3. Of or relating to any of the Native American peoples.
4. Indigenous to North or South America. Used of plants and animals.
n.
1. A native or inhabitant of America.
2. A citizen of the United States.
3. American English.

adj 1: of or relating to the United States of America or its people or language or culture; "American citizens"; "American English"; "the American dream" [syn: American] 2: of or relating to or characteristic of the continents and islands of the Americas; "the American hemisphere"; "American flora and fauna" [syn: American] n 1: a native or inhabitant of the United States [syn: American] 2: the English language as used in the US [syn: American English, American language, American] 3: a native or inhabitant of America [syn: American]

Merriam-Webster பரவாயில்லை. US தொடர்பான பதங்களை கடைசியாகத் தான் தருகிறது.

ஐரோப்பிய காலனியர்கள் சொல்லும் கதை இதுதான்.கொலம்பஸ் "கண்டுபிடித்தாகக்" கூறப்படும் அந்த நிலப்பரப்பு அமெரிக்கா என்று பெயர் பெற்றது 'அமெரிகோ வெஸ்புசி'(Amerigo Vespucci) என்ற அவரது சகாவின் நினைவாக! மெய்யாகவா? கொலம்பஸ் கண்டுபிடித்துவிட்டு தன் சகாவிற்கு ஏன் பெயரை விட்டுக் கொடுக்க வேண்டும்? சற்று உதைக்கிறது.

பூர்வீக அமெரிக்க நிபுணர் ஜாக் ·போர்ப்ஸ்(Jack Forbes), கொலம்பஸ் வருவதற்கு முன்னரே மராக்கா(Maraca), அமரகோபா(Amaracopa) போன்ற பெயர்கள் வழக்கில் இருந்ததாகவும், கரீபியன் பகுதியிலிருந்து வெனின்சுலா, பிரேசில் வரையுள்ள பகுதி அமெரிகாமிக்(Americamique) என்று அழைக்கப்பட்டதாகவும் கூறுகிறார். நிகராகுவா பகுதிகள் 'டியாரா மராக்கா'(Tierra Maraka) என்று இருந்தனவாம். பத்தொன்பதாம் நூற்றாண்டின் மத்தியில் ஐரோப்பாவிலிருந்து வந்து பூர்வீக அமெரிக்கர்களை துரத்திவிட்டு அவர்களின் நிலங்களைப் பிடுங்கி குடியமைத்துக் கொண்டவர்கள், மெக்சிகோவின் பெரும்பகுதியைக் கைப்பற்றினர். 1898ல் கியூபா, காம்(Gham), பிலிப்பைன்ஸ், போர்ட்டோ ரீக்கோ அனைத்தையும் வழித்துக் கொண்டனர். இந்தக் காலனிகளுக்கு அவர்கள் இட்ட பெயர் அமெரிக்கா (Ameican Colonies).

1960-70களில் மெக்ஸிகன்-அமெரிக்கன், ஆப்ரிக்கன்-அமெரிக்கன் போன்ற ஒட்டுப் பெயர்களை அநேகப்பேர் எதிர்த்தனர். லத்தீனோக்காரர்கள் தங்களை 'சிகானோக்கள்'(chicanos) என்று அழைத்துக் கொண்டனர். லாங்ஸ்டன் ஹியூக்ஸ், மால்கம் எக்ஸ், மார்ட்டின் போன்ற பல கருப்புத் தலைவர்கள் ஆப்பிரிக்கன்-அமெரிக்கன் என்ற பெயரை அடிமைத்தனத்தின் நீட்சியாகக் கண்டனர். அமெரிக்கன் என்பது வெள்ளையினத்தை குறிப்பதாக ("American is White") டோனி மோரிஸன் Playing in the Dark என்ற தனது புத்தகத்தில் குறிக்கிறார். 70களின் துவக்கத்தில் கிளம்பிய உத்வேகம் பலரை 'Amerikka' என்று எழுத வைத்தது. அது ஐரோப்பிய காலனித்துவத்தை எதிர்க்கும் சொல்லாகக் கருதப்பட்டது.

இன்று முற்போக்குவாதிகளும், லத்தீன் அமெரிக்க தலைவர்களும், பல இடது சாரி எழுத்தாளர்களும் கூட 'அமெரிக்கா' என்ற வார்த்தையை சுயநினைவின்றி எதேச்சையாக ஒரு நாட்டைக் குறிக்க பயன்படுத்தக் காணலாம். அந்த வார்த்தைக்குப் பின்னால் ஒதுக்கப்பட்ட குரல்களை யாரும் காண்போரில்லை.

அமெரிக்கா என்பது ஒரு நாட்டைக் குறிக்கும் சொல்லன்று. ஐக்கிய மாகாணத்தில் வாழ்பவர்கள் தங்களை அமெரிக்கர்கள் எனத் தாராளமாக அழைத்துக்கொள்ளட்டும். ஆனால் அது அவர்களுக்கு மட்டுமே சொந்தமான் வார்த்தையல்லவே.
வட, தென் அமெரிக்கக் கண்டங்களில் வாழும் அத்தனைப்பேரும் அமெரிக்கர்கள் - இந்தியா, சீனா, ஜப்பான், இலங்கை, மலேசியா, ஈராக், ·பிலிப்பைன்ஸ், வட-தென் கொரியாக்கள், வியட்நாம் போன்ற எல்லா நாடுகளிலும் வாழும் மக்கள் எப்படி 'ஆசியர்' என்ற பெயரினைப் பெறுகின்றனரோ, அதே போல.

நவீன ஆங்கிலப் பயன்பாடான 'கார்ப்பொரேட் அமெரிக்கா', 'அமெரிக்கன் எம்பயர்' போன்ற அரசியல் முக்கியத்துவம் கொண்ட வார்த்தைகளை உபயோகிப்பதில் பேதமில்லை. ஆனால் ஐக்கிய மாகாணம் என்கிற ஒற்றை நாட்டைக் குறிக்கவோ, அங்கு வாழும் மக்களைச் சொல்லவோ, அங்கிருக்கும் வாழ்வுமுறையைச் சுட்டவோ பொத்தாம் பொதுவாக 'அமெரிக்கா' என்ற வார்த்தையைப் பயன்படுத்துவது சர்ச்சைக்குரியதாகிறது. பேரூடகங்கள் லாவகமாக பயன்படுத்தும் 'American Dream, 'It is very American', 'unamerican' போன்ற பிரயோகங்களைக் உன்னிப்பாகக் காணுங்கள். 'அமெரிக்கா', 'அமெரிக்கன்' என்பவை வெறும் வார்த்தைகளல்ல, அது ஒரு ஆதிக்க மனப்பாங்கு; ஐக்கிய மாகாண தேசியவாதத்தை (US Nationalism), அதன் எதேச்சதிகார மனப்பாங்கை உலகமயமாக்கும் வெறிச்சொல் அது. இங்கு 'God Bless America', 'Power is Pride', 'Don't mess with us' போன்ற கார்களின் பின்னால் ஒட்டப்படும் ஸ்டிக்கர்களைப் பார்க்கும் போது இது தெள்ளெனப் புரிபடும்.

அடுத்த முறை 'அமெரிக்கன்' என்று விளிக்கும் போது கொலம்பியனும், மெக்ஸிகனும், நிகராகுவனும், சிலியனும், பனாமியனும், எல் சால்வடாரியனும், அமெரிக்கனே என்பதை நினைவில் கொள்க.

-- வினோபா ; மூலம் 'Z'

இப்போதெல்லாம் ஐக்கிய மாகாணத்தில் வாழ்பவர்களே பேரூடகங்கள் சொல்லும் 'அமெரிக்கன்' என்ற வரைமுறைக்குள் வருவதில்லை. இதை சொடுக்கிப் பாருங்கள் உங்களுள் 'அமெரிக்கன்' இருக்கிறானா என்று.

வாத்யார் வேலை பாத்தது படா ஷோக்காயீந்துச்சுப்பா... இன்னமும் அந்த மப்பு கலையில.

விளம்பரங்கள் அங்கு வரக்கூடாதே என்று கம்முன்னு இருந்தேன். இங்க சொல்லலாம். திண்ணையில் என் கவிதை வந்திருக்கு... கவனித்தீர்களா?

வலைப்பூ-வில் வாத்தியார் வேலை பார்த்துக் கொண்டிருப்பதால் ஒரு வாரம் லீவு. நண்பர்கள் மன்னிக்கவும்.

அன்புடன் வினோபா

சில வாரங்களாகவே வானம் நமக்கு பல (வான?!)வேடிக்கைகளைக் காட்டி வருகிறது. சூரியப்புள்ளிகளின் சேஷ்டை நாளரு மேனியும் பொழுதொரு வண்ணமுமாய் வளர்ந்துகொண்டே போகின்றன. செவ்வாயன்று நிகழ்ந்த சமீபத்திய வெடிப்பு X28ம் ரகத்தைச் சேர்ந்ததாம். இதுவரை ஏற்பட்டதிலேயே பெரியது.

இந்தச்சேதியைத் தெரிந்துகொண்ட சந்திரனும் கேளிக்கையில் கலந்து கொள்ள உத்தேசித்துள்ளது. நமக்கு கொண்டாட்டம் தான் போங்கள்!

டம டம டம டம டம டம டம டம் டம் டடடம் டடடம் டாம்...
இதனால் சகலமானவர்களுக்கும் அறிவிப்பது யாதெனில், நவம்பர் 8ம் தேதி (வரும் சனிக்கிழமை) மாலை 8:06 மணியளவில் வட அமெரிக்கக் கண்டத்தில் வடக்கேயுள்ள கீழைக்கடற்கரைப் பகுதிகளில் "நிலாப் பெண்ணின் கண்ணாம்பூச்சி" என்கிற வான வேடிக்கை (அரைமணி நேரம் மட்டுமே) நிகழ்த்தப்படும் என்பதை தெரிவித்துக் கொள்கிறேன்.
டம டம டம டம டம டம டம டம் டம் டடடம் டடடம் டாம்...

பூரண சந்திர கிரகணம் ஏற்படவிருக்கிறது. ஐக்கிய மாகாணத்தில் வடகிழக்குக் கரையோரம் இருப்போர் பாக்கியசாலிகள். சரியாக இரவு 8:06க்கு பூரணம் தொடங்குகிறது. 25 நிமிடங்கள் தான் இருக்கும் இந்தக் கிரகணம். weather.com-ல் பார்த்துவிட்டேன். அதுவும் ஒத்துழைக்கிறது. ஆகவே அன்று மாலை வேலை வெட்டி எது இருந்தாலும்(சனிக்கிழமை ஆபிஸ் போகும் புண்ணியவான்கள் வெளியே வந்து எட்டிப்பார்த்துவிட்டாவது போங்கள்) அப்படியே போட்டுவிட்டு வானத்தை அண்ணாந்து பார்த்து அதிசயிக்க ஆஜராகிவிடுங்கள். 1

ஐரோப்பியக் கண்டத்தில் இருப்போர் முழித்திருந்தால் பார்க்கலாம். அவர்களுக்கு 1:06க்கு பூரணம் வரத்துவங்கும். ஆசியக்கண்டத்தில் இருப்பவர்கள் நன்றாக இழுத்துப் போர்த்தி தூங்கவும். உங்களுக்கு அடுத்தவருடம் மே-4ம் நாள் பூரண கிரகணம் காண்பிக்கப்படும் என்று பட்சி சொல்கிறது.

அடியேன் தொலைநோக்கி உதவியோடு நிழற்படம் எடுக்கலாம் என்றிருக்கிறென். எடுத்தால், கிரகண சித்தி நல்லபடியாய் அமைந்து ஒழுங்காக வந்தால் இங்கு இடுகிறேன். இல்லையேல் கிரகண பலன் கழிக்க குப்பைத்தொட்டியில் சேர்த்துவிடுகிறென்.

Special thanks to Stephen Barnes for the eclipse picture.

சப்தர் ஹஷ்மியை ஞாபகம் இருக்கிறதா? உங்களுக்கு ஞாபகம் இல்லாமலிருப்பதில் ஆச்சரியமேதுமில்லை. காஸியாபாத் வீதிகளில் அவரை அடித்துக் கொன்றவர்களே மறந்துவிட்டிருப்பர் அவரை.

1989, ஜனவரி 1ம் நாள். ஜந்தாபூர் முனிசிபல் தேர்தல் சமயத்தில் 'உரக்கப் பேசு' (halla bol) என்னும் நாடகத்தை வீதியில் நிகழ்த்திக் கொண்டிருந்த போது குண்டர் படையால் நடுவீதியில் அடித்துக் கொள்ளப்பட்டனர் ஹஷ்மியும் அவரது சக நடிகர் ராம் பகதூரும். சுற்றி நின்று பார்த்துக்கொண்டிருந்தோர் அதுவும் நாடகத்தின் ஒரு பகுதி என்றே நினைத்திருந்தனர் வெகு நேரம் வரையில்!

ஜன் நாட்ய மன்ச் என்கிற வீதி நாடக அமைப்பின் தலைவரும், மார்க்சீய கம்யூனிஸ்ட் கட்சியின் உறுப்பினருமான அவரைக் கொன்ற வழக்கில் குற்றம்சாட்டப்பட்ட 12 பேரில் இருவர் இறந்துவிட்டனர்! மீதமுள்ள பத்துப்பேரும் குற்றவாளிகளென நிரூபிக்கப்பட்டுள்ளனர் பதினான்கு வருடங்களுக்குப் பிறகு. என்ன சொல்லி மெச்ச இந்திய நீதித்துறையின் சுறுசுறுப்பை? 'ஊழ்வினைப்பயன்' (இந்த ஜென்மத்தில் செய்யும் தவறுகளுக்கு அடுத்த ஜென்மத்தில் தான் தண்டனை கிடைக்கும்!) என்னும் இந்துமத சாரத்தை நிலைநிறுத்துகிறார்களா?

காலம் கடந்து வந்தாலும் நீதி கிடைத்திருப்பதில் மகிழ்ச்சியே. இதை சப்தர் ஹஷ்மி என்கிற வீதி நாடகக் கலைஞனுக்கு கிடைத்த வெற்றி என்பதைவிட அரசியலில் வன்முறையைக் கலக்கும் வெறியர்களுக்கெதிரான பாடமாகக் கருதுதலே சரி. இது போன்ற வன்முறை வழக்குகள் நாடெங்கும் நூற்றுக் கணக்கில் நிலுவையில் உள்ளன. எத்தனையோ பேர் ஆளுங்கட்சிக்காரர்களாலும் அரசியல் செல்வாக்குப் பெற்ற ரவுடிகளாலும் கொலை செய்யப்படுகிற போது, அரசியல் எல்லைகளைத் தாண்டி சப்தர் ஹஷ்மி பேசப்படுவது அவர் வீதி நாடகக் கலைஞர் என்பதால். அவர் ஜனநாயக முறையில் தனக்கே உரிய அழகியல் பாணியில் தன் கருத்தைச் சொல்லியபோது அடித்துக் கொல்லப்பட்டதால்.

ஊழலுகெதிராய் குரலெடுத்து வெட்டிக்கொள்ளப்பட்ட மதுரை பெண் கவுன்சிலர் லீலாவதிக்கு என்று நீதி கிட்டுமோ?

காசி அவர்களின் NRI பற்றிய வலைக்குறிப்பு படித்தபின்பு நேற்று பெய்த H1-B, L1 மழையில் இன்று முளைத்த என்னைப்போன்ற NRIக் காளான்களின் விசித்திரச் செய்கைகள் சில மனதில் தோன்றின. அதைப்பற்றி எழுதியாக வேண்டியது என் 'ராஜ' கடமை(சொல்லுதவி :- கவி.வைரமுத்து). இதற்காக அவர்கள் என்னை அகில உலக புலம் பெயர் தமிழர் மகா சபையிலிருந்து தள்ளி வைத்தாலும் பரவாயில்லை.

மின்னணுச்சாதனங்களின் (குறிப்பாகப் படம் பிடி கருவிகள்) மீது எங்களுக்கு இருக்கும் காதல் சொல்லி மாளாது. தேவையோ இல்லையோ வாங்கி வீட்டில் அடுக்கிவிட வேண்டும். இல்லையேல் தமிழ் ஒன்றுசேரல்களில் தலைகுனிவே ஏற்படும்.

முதலில் வாங்குவது கையடக்கத் திரைப்படக்கருவி. Sony தான் மின்னணுச் சாதனங்களுக்கு எங்களின் ஆதர்ஷ புகலிடம். JVR, Panasonic மற்றும் Canon போன்ற மற்ற நிறுவனத் தயாரிப்புகள் சற்று மலிவாய்க் கிடைத்தாலும் ஏறெடுத்துக் கூட பார்த்துவிடமாட்டோமே நாங்கள். வலைப்பக்கங்களை அலசோ அலசென்று அலசி, அன்றைக்கு இருப்பதிலேயே விலை அதிகமான படப்பிடிப்பானை வாங்கவேண்டும். அதை வலை மூலமே வாங்கினால் வரிகள் கிடையாதென்பதால் மின்னட்டை எண்களைத் தட்டி ஆணைகளை அனுப்பிவிட்டு, தலைமேல் கிடக்கும் எல்லா வேலைகளையும் தூக்கி ஒரு மூலையில் கிடாசிவிட்டு, பக்கத்து 'சதுரங்களில்' (cube) ஒழுங்காய் வேலை செய்துகொண்டிருக்கும் சகாக்களிடம் காபித் தம்ளர் சகிதமாகப் போய் தான் வாங்கியிருக்கும் 'top of the line' படக்கருவியைப் பற்றி பீற்றிக்கொள்ளும் சுகம் இருக்கே... அட அட அட...

ம்... படம் பிடிப்புக்கருவி வாங்கியாகிற்று. படம் பிடிக்கத்தெரிய வேண்டாமோ? கற்றுக்கொண்டால் போச்சு. படம் பிடிக்கிறோம் என்று தெரிந்துவிட்டால் போதும் அந்நேரம் வரையில் உலக அரசியல் நிலவரங்களை அலசி ஆராய்ந்து ஓய்ந்த ஜாம்பவான்கள் ஒன்றும் பேசாமல் வழிவார்கள்! வேறு வழியின்றி தேமேயென்று நாமே... பேசி வைப்போம். சுற்றுலா செல்லும்போது மனைவியர் குழந்தைகுட்டிகளின் பால் புட்டி தள்ளுவண்டியோடு மாரடித்துக் கொண்டிருக்க, கணவான்களாகிய நாங்கள் பொறுப்பாக ஆடு, மாடு, கோழி, கழுதை, நடப்பன, பறப்பன - ஒன்றுவிடாமல் ஆவணப்படுத்திக் கொண்டிருப்போம். வீட்டுக்கு வந்து திரையிட்டுப் பார்த்தால், 'ஹாலிவுட்' தரத்திற்கு இருக்கும் என்று கட்டிய கற்பனைக்கோட்டைகள் தவிடுபொடியாகிவிட்டிருக்கும். ஒரே கூச்சலாயிருக்கும் அல்லது சத்தமேயில்லாத ஊமைப்படமாயிருக்கும். (சினிமாவில் எடிட்டிங் தொழில் புரிவோர் தெய்வங்களுக்குச் சமானம்). நடந்து கொண்டே எடுக்கப்பட்ட காட்சிகள் பார்க்கச் சகிக்காமல் நிலநடுக்கம் வந்தாற்போல ஆடியிருக்கும். இந்த அழகில் 'zoom-in-out' காட்சிகள் வேறு. கொஞ்ச நாள் ஆனதும் இவ்விளையாட்டு சலித்துப்போய் படக்கருவி பெட்டியில் முடங்கும். (அல்லது பையனைப் பார்க்கவரும் பெற்றோர் தலையில் கட்டப்படும் - அப்போது தானே புதிதாய் விற்பனைக்கு வந்திருக்கும் மின்னூடக திரைப்படக்கருவி வாங்கலாம்!)

அவ்வப்பொழுது ஊர் சுற்றிப்பார்க்க குழாமாகக் கிளம்பி வெளியூர் போய் வந்ததும், சில மாதங்கள் நமக்கு முன்னால் வந்துவிட்ட, விபரம் தெரிந்த நண்பர்கள் பெற்றோருக்கு நிழற்படங்களை 'ஒளிவரைவு' (scan) செய்தனுப்புகையில் மெலிதாய் தலையில் முளைக்கும் - பொறாமையின் கொம்புகள்! 'Single Lens Reflex' எனப்படும் 'ஒற்றை லென்சு வழி நோக்கும்' நிழற்படக்கருவிகளை வைத்திருக்கும் நண்ப நண்பிகள் 'SLR போல் வராது டிஜிடல்' (இந்தக் கதையை யார் கிளப்பியது எனத் தெரியவில்லை. தெரிந்தால் சொல்லுங்கள். வெட்டணும்!) என்றளக்கும் போது பொறாமைக்கொம்பு வேர்விட்டு வெளிக்கிளம்புவது இயல்புதானே? பெற்றோர், அவர்கள் சம்பளத்தில் கல்லூரியில் படிக்கையில் வாங்கித் தந்த 'சுட்டு-எடு-படக்கருவி' (point & shoot camera) ஈயமாக நம்முன் இளிக்கும். விட்டேனா பாரென்று அன்றைக்கே வலையில் மீண்டும் விழுந்து புரண்டு சில நூறு டாலர்களில் கிடைக்கும் Nikon-ஐயோ அல்லது canon-ஐயோ ஆணையிட்ட பின்புதான் அடங்குமந்த ஆசைத்தீ!!

இந்த 'top of the line' கொள்கையெல்லாம் SLR-க்கு செல்லுபடியாகாது. ஆயிரக்கணக்கில் செலவாகுமே! ஆக எங்களின் பணப்பைக்கு ஏற்றவாறு 'bottom of the line SLR'தான் கையில் தேறும். அதன் பயணர் புத்தகத்தைப் (User Manual) படித்து பட்டம் பெறுவதற்குள் வயதாகிவிடுமென்று உத்தேசித்து ஒரு வரி கூடப் படிக்காமல் அதை பத்திரமாக அலமாரியில் அட்டை போட்டு வைத்துவிட்டு, தானியங்கி நிலையில்(auto mode) வைத்தே காலத்தை ஓட்டுவோம். முதல் சுருளைப் பதிப்புச் செய்து பார்த்ததும் உலகமே கையிலடங்கி விட்டாற்போல மமதை தலைக்கேறும். இந்த இடைவெளியில் "SLR-படச்சுருள்-பதிப்புகள் பளிச்!பளிச்!" என்கிற இந்த SLR மாயமெல்லாம் மறைந்து 'மின்படக்கருவிகளின்' (Digital Camera)விலை தடாலென்று குறைந்து நல்ல தரமான மின்படக்கருவிகள் விற்பனைக்கும் வந்துவிடும். இப்போது மீண்டும் மின்படக்கருவிகள் வைத்திருப்பவர்களைக் கண்டால் கொம்பு முளைவிடும். கொஞ்ச நாள் கழித்து படச்சுருள் வாங்கி, கழுவி, பிரின்ட் செய்து மாளாமல் குறைந்த விலையில் ஏதாச்சும் மின் நிழற்படக்கருவி கிடைக்கிறதா என்று விரல்கள் வலை நோக்கி ஓடும்! அடுத்த விழாக்காலத் தள்ளுபடிக்காக காத்திருந்து 'நன்றியுரைக்கும் நாள'ன்று (Thanks Giving Day) என்றுமில்லாக் கோலமாய் விடியலுக்கு முன் எழுந்து Best Buy, Circuit City போன்ற கடைகளின் முன் கடைதிறப்பவனின் தரிசனத்திற்கு தவங்கிடப்போம். அங்கிருக்கும் விற்பனையாளர்கள் மின்-படக்கருவியுடன் ஒளி வரைவியன்றையும்(scanner) பதிப்பானொன்றையும்(printer) சேர்த்து தலையில் கட்டிவிடுவார்கள்.

இப்போது எங்களிடம் படம் பிடிக்க மட்டும் எத்தனை கருவிகள் தெரியுமா?

1. Point & Shoot Camera - just for its antique value!!

2. Di-8 Sony Cam Corder - Sent to India.

3. Digital Camcorder - kept safe in closet after few weeks of purchase.

4. Nikon SLR Camera - For "Clearest" possible picture on earth!

5. Nikon CoolPix 5000(Or whatever latest model available in the market) - For instant picture taking & sending via e-transport!

நல்ல வேளை, மறந்தே போயிருப்பேன் இதை-
6. Web Cam - for MSN Chat!!

இவை ஒன்றொன்றிற்கும் என்ன விலை என்று கூட்டிப் பார்த்தால் மயக்கம் வரும், எங்களுக்கே. எங்களின் இந்தியப் பெற்றோர்களின் இதய நலன் கருதி DVD, VCD வகையறாக்களைப் பட்டியலிடாமல் இங்கு விட்டுவிடுகிறேன்.

சூரியனின் மேற்பரப்பில் தோன்றும் காந்தவிசைக் குவிவு சூரியப்புள்ளிகளாக உருவெடுக்கின்றன. சரியான தற்காப்புகளோடு பார்த்தால், தொலைநோக்கியிலோ வெற்றுக் கண்ணோலோ பார்க்க முடிகிற இந்தக் கரும்புள்ளிகள் நிஜமாகவே கரும் புள்ளிகள் அல்ல. மற்ற பரப்பைவிட சற்று சூடு குறைந்தவை. கதிரோனின் மேற்தகட்டின் வெப்பநிலை 5700 கெல்வின்(0 டிகிரி செல்சியஸ் = 273.15 கெல்வின்) என்றால் இந்தப் புள்ளிகள் 2000 டிகிரி கெல்வின்கள் அவ்வளவே!! இவற்றை தனியாகப் பார்க்க நேர்ந்தால் இவையும் வெகு பிரகாசமாகவேயிருக்கும். வெப்பமிகு சூரியத்தகட்டில் சற்று தணிவாயுள்ள பகுதிகள் கருமையாய்த் தெரிகின்றன. தெரிந்துவிட்டுப் போகட்டுமே எனக்கென்னவென்று நாம் இருக்கமுடியாது. இந்தப் புள்ளிகள் தேமே என்றிருக்காமல் நொடிக்கு 500கி.மீ வேகத்திலடிக்கும் சூரியக்காற்றை வானெங்கும் விசிறியடிக்கின்றன. இச்சூரியக்காற்று பூமியைத்தாண்டிச் செல்லும்போது நம் காந்தப்புலத்தை ஒரு கலக்கு கலக்கிவிட்டுப் போகின்றன. சூரியக்காற்றால் புவியின் காந்தப்புலம் அதிர்வுறுவதோடு, நம் அவ்வப்பொழுது அனுப்பிவைத்த சாட்டிலைட்டுகளின் உணர்விகளையும் வெகுவாகப் பாதிக்கின்றன. நம் தொலை தொடர்பு சாதனங்களும் மின்நிலைய கிரிட்களும் சூரியக் காற்றின் காந்தப்புயலால் தூண்டப்பட்டு மின்சேதமடைகின்றன.

பொதுவாக இந்தச் சூரியப்புள்ளிகள் 11 வருடச் சுழற்சியில் இயங்குகின்றன. சில வருடங்களுக்கு முன் இந்தச் சுழற்சியின் உச்சம்(solar maximum) நம்மைத் தாக்கிப்போனது.

சுழற்சியின் பின்-நீட்சியாகத் தோன்றியிருக்கும் சமீபத்திய புள்ளிகள் இன்னும் சில வாரங்கள் வரை நீடித்திருக்கும். அக்-22 ம் தேதி ஏற்பட்ட காந்தப்புயல் கடந்த வாரம் பூமியைத் தாக்கிற்று.

இதே போலவே 486 என்கிற புள்ளியிலிருந்து மாபெரும் சூரியப் பிழம்பு நேற்று வெடித்துச்சிதறியிருக்கிறது. இதன் காந்தக்கதிர்களும் புரோட்டானியப் பொழிவும் இன்று பூமியை வந்து சேரும். 1859ம் ஆண்டிற்குப் பிறகேற்பட்ட மாபெரும் ஒற்றை வெடிப்பு என வானியலாளர்கள் சொல்கிறார்கள். இந்தப் புள்ளியை X17 ரகப் படுத்துகிறார்கள். X - பெரியது என்பதையும், 17 என்ற எண் அதன் வலுவையும் குறிக்கிறதாம். இதன் தாக்கம் பூமியில் பெரும் சிக்கல்களை ஏற்படுத்தலாம் என்று சாட்டிலைட் தொடர்பு மையங்கள், மின் நிலையங்கள் எல்லாம் தயார்படுத்தப் பட்டுள்ளன. NASA விண்வெளி வீரர்களை இந்த நாட்களில் விண் நடப்பெதுவும் (space walk) செய்யாமல் இருக்கச் சொல்லியிருக்கிறது.


Becky Ramotowski என்பவர் தன் கொல்லைப்புறத்திலிருந்து டிஜிடல் கேமிரா, 80mm ஒளிவிலக்கு தொலைநோக்கி நல்லதொரு காப்புக் கண்ணாடி(solar filter) கொண்டு இவ்வெடிப்பைப் படம் பிடித்திருக்கிறார்.

"அறிவியல் போதும். வேற ஏதாச்சும் கவித்துவமா சொல்" என்னும் அழகியல் பிரியர்களுக்கு: சூரியப்புள்ளிகள் சேதம் மட்டும் தந்து போவதில்லை. சில காணக்கிடைக்கா அற்புதங்களையும் நிகழ்த்தும். வடகோளப்பகுதிகளில் வாழும் பேறு படைத்தோர் இதனால் உண்டாகும் 'அரோரா' எனப்படுகிற மின்,விண்,வண்ணஜாலத்தைக் கண்டுகளிக்கலாம்.

அக்-16 ல் பதிவுசெய்யப்பட்ட (க)வி(ந்)தை -


மேலும் கவிதைகளுக்கு, மன்னிக்க கட்டுரைகளுக்கு (அடிக்க வர்ராங்கோ வுடு ஜூட்): http://skyandtelescope.com/observing/objects/sun/article_1084_1.asp

Pictures credit: Space.com

ஏன் எல்லோரும் இப்படித் திட்டுகிறீர்கள்? ஞாநி முதற்கொண்டு யமுனா ராஜேந்திரன் வரையில் திண்ணையில் சவுக்கை எடுத்து விளாசித் தள்ளியிருக்கிறார்கள். 'பாய்ஸ்' படத்தில் எத்தனையோ நல்ல விஷயங்களை சொல்லியிருக்கிறார்கள் இளைஞர்களுக்கு.

1. விலைமாதை வீட்டிற்கு அழைத்து வந்தாலும் ஒன்றும் செய்யாமல் திருப்பி அனுப்பிவிடும் 'அப்பாவி' இளைஞர்களின் உள்ளத் தூய்மை.

2. வீட்டைத் துறந்து வீதிக்கு வந்து திருமணம் செய்து கொண்ட பின்னரும் முதலிரவன்று "படிக்கிற வயதில் பால் பவுடர், டையபர் என்று குழந்தைப் பேறு தேவையா?" என யோசித்து விலகும் பொறுப்புணர்வுள்ள பிரம்மச்சரியம்!

3. வாழ்க்கையில் முன்னுக்கு வர எதையும் செய் - ஐயப்பன் பாடல், வீதி நாடகப் பாடல், பாப் ஆல்பம் - எதையும் செய்; பணம் சம்பாதித்தலே முழுமுதற் கொள்கை என்னும் வாழ்வியல் பாடம்.

4. எங்கே தப்பித் தவறி தவறான பாதையில் போய்விடுவார்களோ என்று ஓட்டைப் பாத்திரத்தில் ஆய் கழுவும் ஜெயில் வாழ்வு பற்றிய POTA எச்சரிக்கைகள்.

5. SONY, CRICKET MATCH - இவைகளை நடத்தும் முதலாளிகள் தாம் நாளைய இளந்தலைமுறையின் நம்பிக்கை நட்சத்திரம். அவர்கள் காலில் விழு, கதறு, Please, Plaese என்று தன்மானம் துறந்து பிச்சை எடு என்னும் முற்போக்குத் தத்துவங்கள்.

6. நட்பு.

7. நட்புக்காக உயிர் தியாகம்.

8. நட்புக்காக விவாகரத்து.

9. "I Miss U" எழுதும் காதலுக்காக, ரேஷனில் வாங்கிய அரிசியை "Me too" வரைய ரோட்டில் கொட்டும் அரிசித் தியாகம். அதை பொறுக்கச் சொல்லும் "வில்லன்" அப்பா.

10. பெட்ரோல் பங்கில் மிச்சக் காசை வைத்துக் கொள்ளச் சொல்லும் பெற்றோரிடம் "எனக்குச் சம்பளம் தருகிறார்கள்" என்று திருப்பிக் கொடுக்கும் கண்ணியம், கட்டுப்பாடு.

11. காதலைத் துறந்து வாழ்க்கையை சரி செய்துகொண்ட அப்பா.

12. காதலியைக் கைப்பிடித்து வசதி இழந்த அப்பா.

13. இரண்டில் எது சரியென்று முடிவெடுக்க முடியாமல் தவிக்கும் இளைஞ-இளைஞிகளுக்கு 'கருத்து' சொல்லும் விவேக்.

14. காதலுக்காக எல்லாவற்றையும் இழந்து நின்றாலும், அமெரிக்கா ஓடிப் போன காதலியை நினைத்து உருகி, வாரம் தவறாமல் 'கில்மா'விடம் போகும் God Father விவேக்

15. ARR இசையுடன் "தமிழ்" கொஞ்சும் பாடல்கள்- உலகத் தரத்தில்.

16. சுஜாதா ரங்கராஜனின் சிந்தனையைத் தூண்டும் கூர்மையான ஆழமான வசனங்கள்.

17. கண்கவர் கிராபிக்ஸ் பிரமிப்புகள்.

18. 60 கேமிராக்களுடன் சங்கர் குழு.

- என்று எத்தனை 'நல்ல' விஷயங்கள் தெரியுமா?
இதையெல்லாம் பார்க்காமல் விட்டுவிட்டு, முதலில் வரும் பத்து பதினைந்து நிமிடக் காட்சிகளை மட்டும் திட்டுவது அபாண்டம். அவைகளெல்லாம் "ஊர்ல நடக்கிறவை". வாலிபப் பருவத்தின் 'இயல்பான' வெளிப்பாடு. பத்து பாத்திரம் தேய்க்கும் முனியம்மாவின் பையனும், ஹோட்டலில் சர்வர் வேலை பார்க்கும் முனிசாமியின் பையனும் கெட்டுப் போவது 'டிஸ்கவரி சேனலும், F டிவியும்" பார்த்துத் தான். மற்றபடி திரைப்படங்களுக்கும் அவர்களுக்கும் எந்த சம்பந்தமும் இல்லவே இல்லை.

யார் என்ன சொன்னால் என்ன? என்னை பொறுத்தவரையில் "பாய்ஸ்" திரைப்படம் நெய்யில் வறுத்த முந்திரி, திராட்சைகள் நிறைந்த அருமையான பால் பாயாசம். பாயாசக் கிண்ணத்தில் மலம் ஒட்டியிருந்தால் என்ன? துடைத்துவிட்டு சாப்பிடுங்கள். சுவையாக இருக்கும்.